King Solomon’s Mines (1885) ரைடர் ஹக்கார்ட் எழுதிய புகழ் பெற்ற சாகச நாவல். இந்த நாவல் ஒரு sub-genreஐயே உருவாக்கியது. எங்கோ மறைந்து கிடக்கும் ஒரு நாகரீகம் – Lost World Adventure Stories – அங்கே தற்செயலாகவோ அல்லது அதைத் தேடியோ செல்லும் நாயகன், அவனது சாகசங்கள் என்று ஒரு சட்டகம் வெகு விரைவில் உருவானது.

இன்றும் படிக்கக் கூடிய சாகசக் கதை. கதையின் எளிமை, சட்டகத்தில் சரியாகப் பொருந்துதல் இரண்டும்தான் இந்த நாவலின் பலம்.

ஆலன் க்வேடர்மெயின் ஒரு யானை வேட்டைக்காரன். தென்னாப்பிரிக்காவில் வாழும் ஆங்கிலேயன். காணாமல் போன தன் தம்பியைத் தேடி வரும் கர்டிஸ், கர்டிஸின் நண்பர் கேப்டன் குட், வாட்டசாட்டமான ஜூலு இனத்தைச் சேர்ந்த உம்போபா அனைவரும் சாலமனின் வைரச் சுரங்கத்தை தேடிச் செல்கிறார்கள். அந்தப் பக்கம்தான் தம்பி போயிருக்கிறான். சுரங்கம் இருக்கும் இடத்தில் ஒரு ஜூலு இனத்தவரின் அரசு. அந்த அரசின் வாரிசுதான் உம்போபா. உம்போபாவின் சித்தப்பா ட்வாலா உம்போபாவின் அப்பாவை வஞ்சகமாகக் கொன்றுவிட்டு அரசாள்கிறான், அவனுக்கு உதவியாக ஒரு சூனியக்காரி. ஜூலு குடியினர் பார்த்திராத மூக்குக் கண்ணாடி, பொய்ப்பற்கள், சந்திர கிரகணம் வரப் போகிறது என்று தெரிந்திருப்பது எல்லாம் இவர்களுக்கு சாதகமாக அமைகின்றன. போர் நடக்கிறது. கர்டிஸ் பீமன் போல போரிடுகிறார், ட்வாலாவைக் கொல்கிறார், உம்போபா அரசனாகிறான். சூனியக்காரி அவர்களை வைர ஆசை காட்டி ஒரு அறையில் தள்ளி பூட்டிவிடுகிறாள். எப்படி தப்புகிறார்கள், என்ன நடக்கிறது என்று கதை போகிறது.

பதின்ம வயதைத் தாண்டிதான் முதன்முதலாகப் படித்தேன். பிடித்திருந்தது. இன்றும் பிடிக்கிறது. ஆனால் 1885-இல் வாசகர்கள் எப்படி உணர்ந்திருப்பார்கள்!

க்வேடர்மெயின் கதைகள் நிறைய இருக்கின்றன. She என்ற புகழ் பெற்ற நாவலையும் ஹக்கார்ட் எழுதி இருக்கிறார்.

நிச்சயம் இந்த நாவலை இன்றும் படிக்கலாம். நான் பரிந்துரைப்பேன்…

க்வாடர்மெய்ன் கதைகள் ஒரு தொடராக வந்தவை. Allan’s Wife குறுநாவல் க்வாடர்மெய்ன் தன் மனைவி ஸ்டெல்லாவை சந்தித்து மணப்பதை விவரிக்கின்றன. கதையின் சிறந்த பகுதி ஸ்டெல்லாவின் சேடி ஹென்ரிக்காவின் விவரிப்புதான். ஹென்ரிக்கா குரங்குகளால் வளர்க்கப்பட்டவள், ஸ்டெல்லாவை வழிபடுபவள், ஆலன் மீது பொறாமை.

ஆலன் க்வேடர்மெய்ன் (1887) நாவல் இன்னொரு நல்ல சாகச நாவல்.  ஊகிக்கக் கூடிய கதைப்போக்கு என்றாலும் நன்றாக கட்டமைக்கப்பட்ட நாவல். இதில் ஆலன், கர்டிஸ், குட், உம்போபாவுக்கு பதிலாக உம்ஸ்லோபோகோஸ் என்ற ஜூலு ஆகிய நால்வரும் ஆஃப்ரிக்காவில் இருக்கும் வெள்ளை இனத்தினரின் அரசைக் கண்டுபிடிக்கிறார்கள். கர்டிஸ் அதன் அரசி நைலெப்தாவை மணக்கிறார். நைலெப்தாவின் தங்கை சோரெய்ஸுக்கும் கர்டிஸ் மீது ஈர்ப்பு, அதனால் உள்நாட்டுப் போர் நடக்கிறது. உம்ஸ்லோபோகோஸ் அரண்மனையின் மாடியில் நின்று ஐம்பது பேர் படையைத் தடுப்பது சிறப்பான காட்சி. காட்சிகள்தான் நினைவிருக்கப் போகின்றன. பூமிக்கடியில் செல்லும் ஒரு நதி; நதியின் நடுவில் பெரும் தீ! நீர் நெருப்பை அணைத்துவிடாதா, நெருப்பு நீரை ஆவியாக்காதா என்றெல்லாம் கேள்வி கேட்கக் கூடாது. அதில்தான் ஹக்கார்டின் திறமை இருக்கிறது. நண்டுகளிடமிருந்து தப்பிப்பது இன்னொரு நல்ல காட்சி. இளம் வயதில் படித்திருந்தால் இன்னும் மகிழ்ந்திருப்பேன்!

சில சிறுகதைகளும் – Allan’s Wife and Other Tales (1889) புத்தகத்தில் தொகுக்கப்பட்டவை – Hunter Quatermain’s Story, A Tale of Three Lions, Long Odds படிக்கக் கூடியவை

தொகுக்கப்பட்ட பக்கம்: சாகச நாவல்கள்

தொடர்புடைய சுட்டிகள்:

• King Solomon’s Mines மின்பிரதி
• Allan’s Wife and Other Tales
• King Solomon’s Mines விக்கி குறிப்பு
• ரைடர் ஹக்கார்ட் விக்கி குறிப்பு