பயணத் திட்டமிடலுக்காக எடுத்துவைக்கப்படும் திரைபிடிப்புப் (screenshot) படங்களை ஆய்வு செய்யும் அம்சம் ஒன்றை அறிமுகப்படுத்தியுள்ளது கூகுள் வரைபடங்கள் செயலி.

கோடைக்காலம் வேறு ஆரம்பித்துவிட்டது. பள்ளி, கல்லூரிகளுக்கு விடுமுறை விடப்பட்டு, விடுமுறையைக் கழிக்க பல்வேறு சுற்றுலாத்தலங்களைத் தேடிக்கொண்டிருக்கிறோம். இந்த தேடல் பயணக்கட்டுரைகள், யூடியூப் காணொளிகள், இன்ஸ்ட்டாகிராம் குறுங்காணொளிகள் எனப் பல வகைகளில் நீள்கிறது. ஒவ்வொருமுறையும் நாம் பார்க்கும் இடங்களை ஞாபகம் வைத்துக்கொள்வது கொஞ்சம் கடினம்தான். ஒருவேளை அவற்றை திரைபிடிப்பு செய்துவைத்துக்கொண்டால் இந்த வேலை எளிதாகும் வாய்ப்புள்ளது.

ஆனால் அதிகமான இடங்களை திரைபிடிப்பு செய்துவைத்தால் குழப்பம்தான் ஏற்படும். இந்த குழப்பத்தையெல்லாம் தீர்த்து நமது பயணத் திட்டமிடலை எளிமைப்படுத்த புதிய அம்சம் ஒன்றைக் கொண்டுவந்திருக்கிறது கூகுள் வரைபட செயலி. இந்த அம்சத்தின் மூலம் நீங்கள் எடுத்த திரைபிடிப்பு படங்களை ஆராய்ந்து அதில் உள்ள இடத்தை குறித்துவைத்துக்கொள்ள முடியும்.

இதனைப் பயன்படுத்தக் கூகுள் வரைபட செயலிக்குள் சென்று, அதில் உள்ள “நீங்கள்” பக்கத்தைத் தொடவேண்டும். அதில் திரைப்பிடிப்புகள் என்ற பக்கம் காணப்படும். அதனைத் தொட்டால் இந்த அம்சம் செயல்படும் விதம் தொடர்பான காணொளி ஒன்று ஒளிபரப்பப்படும். அதனைப் பார்க்கும்பொழுது இந்த அம்சத்தைப் பற்றிய எளிமையான புரிதல் உங்களுக்குக் கிடைக்கும்.

காணொளியைப் பார்த்தபிறகு கூகுள் வரைபட செயலி உங்கள் புகைப்படங்களைப் பயன்படுத்துவதற்கான அனுமதியைக் கேட்கும். நீங்கள் அனுமதியளித்துவிட்டால் போதும். அடுத்த முறை நீங்கள் செய்யும் பயணம் தொடர்பாக திரைபிடிப்பு செய்தால் அந்த படத்தைக் கூகுள் வரைபடங்கள் ஆராயத் தொடங்கிவிடும். அந்த படமானது நீங்கள் செல்ல விரும்பும் இடத்தைப் பற்றிய குறைந்தபட்சத் தகவல்களையாவது கொண்டிருக்க வேண்டும்.

படம் ஆராய்ந்து முடிக்கப்பட்ட பிறகு மறுபார்வை (Review) என உங்களுக்கு ஒரு குறுஞ்செய்தி அனுப்பப்படும். அதைத் தொட்டால் நீங்கள் விரும்பிய இடத்தைப் பற்றிய தகவல்கள் தோன்றும். உங்களுக்குப் பிடித்திருந்தால் அதனைப் பதிவு செய்துவைத்துக்கொள்ளலாம். இவை அனைத்துமே தானாகவே நடக்கும். ஒருவேளை உங்கள் திரைபிடிப்பு படங்களைக் கூகுள் ஆராய்வதை நீங்கள் விரும்பாவிட்டால் அதற்கும் வழி இருக்கிறது. நீங்கள் உங்களுக்குத் தேவைப்படும் திரைப்பிடிப்புகளை மட்டும் கூகுள் வரைபட செயலியில் பதிவு செய்துவைத்துக்கொள்ளலாம்.

இது பற்றிய மேலதிகத் தகவல்களைக் கூகுள் வெளியிட்டுள்ள வலைப்பதிவைப் படித்துத் தெரிந்துகொள்ளலாம்.

• மு. இசக்கிமுத்து.

கூகுள் வலைப்பக்கம்

நம்மில் பெரும்பாலானோர் படங்களைச் சேமித்து வைக்க கூகுள் போட்டோஸ் பயன்படுத்துகிறோம். அதிலிருந்து யாருக்காவது குறிப்பிட்ட படங்களை அனுப்ப நேரும்போது அவற்றைத் தேடுவதற்காகவே நீண்ட நேரம் திரையைத் துழாவி அவதிப்பட்டிருப்போம். அந்தத் தொல்லை இனி இல்லை என்கிறது கூகுள். எப்படி? 

காலம் கடந்து நிற்கும் நினைவுப் படங்களை முன்னர் புகைப்படத் தொகுப்புகள் சேமித்து வைத்திருந்தன. இப்போது எல்லாருக்கும் கூகுள் போட்டோஸ் செயலிதான். நம் திறன்பேசியில் கிளிக் என்று எடுக்கும் ஒளிப்படம், கண்ணிமைக்கும் நேரத்தில் கூகுள் டிரைவில் சேமிக்கப்படுகிறது. பின் எப்போது வேண்டுமானாலும் எடுத்துப் பார்க்க இணையத்திலேயே பத்திரமாய் இருக்கிறது. மக்கள் இதைப் பயன்படுத்தும் முக்கியத்துவத்தை நன்கு உணர்ந்திருக்கும் கூகுள் நிறுவனமும் அவ்வப்போது புதிய சிறப்பம்சங்களை இதில் அறிமுகம் செய்துகொண்டே இருக்கிறது. ஆண்டு, மாதம், நாள் அடிப்படையில் படங்களைச் சேமித்தல், நினைவூட்டல், ஒரே நபர்களை அடையாளம் கண்டு தனியாக தொகுத்து வைத்தல், பின்னணி உட்பட படத்தில் எதையும் எளிதில் திருத்துதல் எனப் பல மேம்படுத்தல்கள் வந்துள்ளன. 

கூகுள் அப்படி ஒரு சிறப்பு மேம்படுத்தலைத் தன் போட்டோ பிக்கர் அம்சத்தில் அறிமுகப்படுத்தியுள்ளது. கூகுள் போட்டோஸில் இருந்து படங்களைப் பகிரும்போது குறிப்பிட்ட படத்தைத் தேர்ந்தெடுப்பது சிரமமாக இருந்தது. ஆயிரக் கணக்கில் படங்கள் இருந்தால், நீண்ட நேரம் திரையை துழாவித் துழாவிச் சென்று எடுக்க வேண்டியிருந்தது. இதை போட்டோ பிக்கரின் புதிய அம்சம் மாற்றியுள்ளது.

கூகுள் போட்டோஸ் செயலியில் பதிவேற்றப்படும் படங்களின் தன்மைகளைப் புரிந்துகொள்ளும் தொழில்நுட்பம் இதற்கு உதவி செய்கிறது. அதாவது, நாம் திறன்பேசியில் தட்டச்சு செய்யும் இடத்தில் எமோஜிகளைத் தேடும் தேடல் பட்டை  இருப்பதுபோல போட்டோ பிக்கர் இடத்திலும் தேடல் பட்டை அமைக்கப்பட்டுள்ளது. அதில் “கார்” “பிறந்தநாள்” என்பது போன்ற குறிப்புச் சொற்களை நாம் உள்ளிட்டுத் தேடினால் அதற்குத் தொடர்புள்ள படங்களை போட்டோ பிக்கர் தனியே பிரித்துக் காட்டிவிடுகிறது. இப்புதிய தேடுதல் அம்சம் கூகுள் போட்டோஸ் பயன்பாட்டை மிகவும் எளிமை ஆக்கியிருக்கிறது. 

இத்தேடுதல் அம்சத்தால் பயனர்கள் ஆயிரக்கணான படங்களில் குறிப்பிட்ட சிலவற்றை மட்டும் விரைந்து எடுத்துவிட முடியும். பயன்படுத்திக் கொண்டிருக்கும் செயலிகளை விட்டு வெளியேறாமல் படங்களை அனுப்பிவிட முடியும். கூகுளின் செயற்கை நுண்ணறிவு இந்த வேலையைத் துல்லியமாகச் செய்வதால் தனிப்பயனாக்கம் சிறந்த முறையில் நிகழ்கிறது. 

தற்போது வரை கூகுள் பிளே சிஸ்டம் வழியாக கூகுள் போட்டோஸை மேம்படுத்தும் பயனர்களுக்கு மட்டுமே இவ்வம்சம் வழங்கப்பட்டு வருகிறது. விரைவில் புதிய ஆண்டிராய்டு மேம்படுத்தலில் அனைவருக்கும் கிடைக்கும் எனக் கூறப்படுகிறது. மேலும் பிக்ஸல் மற்றும் சாம்சங் கருவிகளில் சோதனை நிலையில் உள்ளதாகவும் கூறப்படுகிறது. இதன்மூலம் புகைப்பட தொகுப்புகள், கோப்புகள் பகிரப்படுவது, சமூக ஊடகப் பயன்பாடுகள் போன்றவை எளிமையாகிறது. நேரத்தை மிச்சப்படுத்துகிறது. கூகுள் இயல்பாக தரும் 15 ஜிபி நினைவகத்தையும் கடந்து பல ஜிபிகளுக்கு புகைப்படங்களைச் சேமித்து வைத்திருக்கும் பயனர்களுக்கு, இப்புதிய அறிமுகம் மிகுந்த பயனளிக்கும் என்பதில் ஐயமில்லை.

• விவேக்பாரதி

கூகுள் போட்டோ பிக்கரின் தேடல் குறித்த செய்தி

கூகுள் மொழிபெயர்ப்புச் செயலியில் தேடுதலை எளிமைப்படுத்தவும் , தெரியாத மொழியை எளிதாகக் கற்றுக்கொள்ளவும் புதிதாக இரு அம்சங்கள் வரவுள்ளன. 

கூகுள் மொழிபெயர்ப்பு என்பது இலவசமாகக் கிடைக்கும் இணையதளம் மற்றும் கைப்பேசி அடிப்படையிலான மொழிபெயர்ப்பு சேவையாகும். இது உலகளாவிய தகவல் தொடர்பை எளிமையாக்கிவருகிறது. ஒவ்வொரு பதிப்பிலும் இதன் தரம் மேம்பட்டுக்கொண்டே வருகிறது. கூகுளிடம் பலமான மொழிபெயர்ப்பு கட்டமைப்பு இருந்தாலும், அதன் மூலம் ஒரு தெரியாத மொழியை எளிதாகத் தெரிந்துகொள்வது கொஞ்சம் கடினம்தான். இதனை வாய்ப்பாகப் பயன்படுத்தித்தான் டியோலிங்கோ போன்ற செயலிகள் பயனர்களை விளையாட்டு அனுபவத்திலேயே வைத்துக்கொண்டு மொழியைக் கற்க உதவிபுரிந்தன. புரிகின்றன.

ஒரு தொழில்நுட்பத்தின் வளர்ச்சிக்கு அதன் எளிமைப்படுத்துதல் மிக அவசியம். அதனால் டியோலிங்கோவைப் போன்றே அம்சம் ஒன்றைக் கொண்டுவரவுள்ளது கூகுள். பயிற்சி (Practice) என்ற பொத்தானின் மூலம் அதனைச் சாத்தியப்படுத்த விரும்புகிறது. பொதுவாக கூகுள் மொழிபெயர்ப்புச் செயலியில் நீங்கள் ஒரு சொல்லை உள்ளிட்டு அதன் பொருளை உங்களுக்குத் தேவையான மொழியில் தெரிந்துகொள்கிறீர்கள். அப்போது அந்த மொழிபெயர்ப்புப் பக்கத்தின் அருகே பயிற்சி என்ற புதிய பொத்தான் காண்பிக்கப்படும்.

அதனைத் தொட்டால் அந்த மொழியைக் கற்றுக்கொள்வதற்கான புதிய பக்கம் ஒன்று திறக்கும். அதில் சிறு சிறு செயல்பாடுகள், சொல் விளையாட்டுகள் வழங்கப்பட்டுள்ளன. அதன் மூலம் எளிதாக ஒரு மொழியைக் கற்றுக்கொள்ள முடியும். இதனைப் பயன்படுத்துவதற்கு உங்கள் கூகுள் கணக்கைப் பயன்படுத்தி உள்நுழைந்திருக்க வேண்டும். அதோடு கூகுள் மொழிபெயர்ப்பு செயலிக்கு ஒலிவாங்கிக்கான அனுமதியையும் வழங்க வேண்டும். இது மட்டுமில்லாது இன்னும் ஒரு மாற்றமும் வரவுள்ளது. 

தேடுதலை எளிமைப்படுத்தும் விதத்தில் இருக்கிறது இந்த அம்சம். ஒரு சொல்லைக் கூகுள் மொழிபெயர்ப்புச் செயலியில் உள்ளிடுகிறீர்கள். அப்போது அதைப் பற்றிய மேலதிகத் தகவல்கள் உங்களுக்குத் தேவைப்படுகிறது எனில், அதே சொல்லை மீண்டும் தேடுதல் பொறியிலும் உள்ளிடுவீர்கள். இப்போதைய புதிய அம்சத்தில் உங்கள் மொழிபெயர்ப்புப் பக்கத்திற்கு அருகிலேயே கூகுளின் குறியீடு தோன்றும். அதைத் தொட்டால், நேரடியாகத் தேடுதல் பொறி வழங்கும் முடிவுகள் தோன்றும்.

இந்த இரு புதிய அம்சங்கள் பற்றிய குறிப்புகள் கூகுள் மொழிபெயர்ப்புச் செயலியின் புதிய பதிப்பான 9.7.102 வில் உள்ளதாகத் தகவல் வெளியாகியுள்ளது. இப்பதிப்பு பயனர்களின் கைகளை வந்து சேரும்போதுதான் இதனைப் பற்றிய அனைத்து தகவல்களும் தெரியவரும்.

• மு.‌இசக்கிமுத்து.

திறன் பேசிகளில் நாம் அடிக்கடி பயன்படுத்தும் தொல்லை தாராதீர் (DND – Do Not Disturb) அம்சத்தை, மீண்டும் எளிமைப்படுத்தும் நடவடிக்கையை கூகுள் மேற்கொண்டுள்ளது. அதன் விரிவாக்க முயற்சிக்கு பயனர்களின் கலவையான விமர்சனங்கள் கிடைத்ததால் இந்த முடிவு எடுக்கப்பட்டுள்ளதாகக் கூறப்படுகிறது.

என்னதான் ஆச்சு? 

‘தொந்தரவு செய்யாதே’ என்ற நேரடி மொழியாக்கம் கொண்ட ‘டு நாட் டிஸ்டர்ப்’ அம்சம், திறன்பேசிகளில் வரும் அழைப்புகள், செய்திகள் மற்றும் தகவல்களின் ஒலி அமைப்பைத் தானாகக் குறைத்து, அமைதியான சூழலை உருவாக்குகிறது. அன்றாடம் திறன்பேசிகளில் வந்து குவியும் நூற்றுக் கணக்கான தகவல் அறிவிப்புகளால் தொல்லை வேண்டாம் என்று நினைப்பவர்களுக்கு இவ்வம்சம் வரமாகச் செயல்படுகிறது. விமானப்பயன்முறை (Airplane mode), அறிவிக்கைகளை (Notifications) அணைத்து வைப்பது, திறன்பேசியை அமைதியான நிலையில் வைப்பது (Silent mode) போன்ற வழக்கமான வழிகள் இதற்கு இருந்தாலும், தொல்லை தராதீர் (DND) என்பது எளிதில் உதவும் கண்கண்ட மருந்தாக அமைகிறது. வாகனம் ஓட்டுபவர்கள், பெற்றோர், ஆசிரியர்கள், மாணவர்கள், அலுவலகப் பணியாளர்கள் என பலதரப்பட்ட மக்களுக்கும் இவ்வம்சம், ஒரே தொடுதலில் பயனளித்து வருகிறது.

இந்நிலையில், மக்கள் அதிகம் பயன்படுத்தும் இவ்வம்சத்தை விரிவாக்க முயன்ற ஆண்டிராய்டு, கூகுள் நிறுவனத்துடன் இணைந்து மோட்ஸ் (Modes) என்ற புதிய தொகுப்பைக் கொண்டு வந்தது. பொதுவாக அமைப்புகள் பகுதியில் ஒரே தொடுதலில் இயக்கக் கூடியதாக இருக்கும். அதில் தொல்லை தராதீர் அம்சத்தை, ஆண்டிராய்டு 15 இயங்குதளங்களில் மோட்ஸ் என்ற தொகுப்புக்குள் கொண்டு வந்தனர். இதன் மூலம் பொதுவாக இருந்த இந்த அம்சத்தை,  வாகனம் ஓட்டுதல், தூக்கம், பணிச்சூழல் எனப் பல செயல்பாடுகளுக்கு தனிப்பயனாக்கும் வசதி உருவாக்கப்பட்டது.

சிக்கல் வந்தது

ஆண்டிராய்டு 15 மேம்படுத்தலைப் பயன்படுத்திய பயனர்களிடமிருந்து இந்தப் புதிய மாற்றம் கலவையான விமர்சனங்களைப் பெற்றது. இதற்கு முன்னர் ஒரே தொடுதலில் இயக்கும் வகையில் விரைவுச் சுட்டியாக இருந்த தொல்லை தராதீர் அம்சம், மோட்ஸ் என்ற தொகுப்புக்குள் வைக்கப்பட்டது. இதனால், இவ்வசதியை அடிக்கடி பயன்படுத்தும் பெரும்பாலான பயனர்களுக்கு இதை இயக்க இரண்டு அல்லது அதற்கு மேற்பட்ட படிகள் தேவைப்பட்டன. இது கடினமாக இருப்பதாக பயனர்கள் தெரிவித்தனர். பலரிடமிருந்தும் இதே வகையான புகார்கள் எழுந்தன. இதனடிப்படையில் கூகுள் நிறுவனம் தொல்லை தராதீர் அம்சத்தைப் பழைய நிலைக்கு மாற்றும் முடிவுக்கு வந்துள்ளது. 

மீண்டும் எளிமையாகிறது

ஆண்டிராய்டு 16 மேம்படுத்தலின் பீட்டா பதிப்புகளில், தொல்லை தராதீரு் அம்சத்தைப் பழைய படி விரைவுச் சுட்டியாக அமைத்து கூகுள் சோதித்து வருகிறது. புதிதாக அறிமுகப்படுத்தப்பட்ட மோட்ஸ் அம்சத்துடன் சேர்த்து பொதுவானதொரு தொல்லை தராதீர் அம்சத்தை விரைவுச் சுட்டியாக வைக்கும் முயற்சி நடந்து வருவதாகக் கூறப்படுகிறது. இதன்மூலம், பயனர்கள், புதிய விரைவுச்சுட்டியை, தற்போதைய மோட்ஸ் விரைவுச்சுட்டியுடன் சேர்த்தோ தனியாகவோ இயக்க முடியும். முன்னோட்ட நிலையில் உள்ள இந்த வசதி, விரைவில் ஆண்டிராய்டு 16 இன் முதன்மை வெளியீட்டில் அதிகாரப்பூர்வமாக வெளியிடப்படும் என்று ஏதிர்பார்க்கப்படுகிறது.

மொத்தத்தில், கூகுள், பயனர்களின் பின்னூட்டங்களை கவனித்து, தொல்லை தராதீர் விரைவுச்சுட்டியை மீண்டும் அறிமுகப்படுத்துவதன் மூலம், பயன்பாட்டை எளிமைப்படுத்தும் முயற்சியில் ஈடுபட்டுள்ளது. இந்த மாற்றம், ஆண்டிராய்டு பயனர்களுக்கு மேலும் சிறந்த அனுபவத்தை வழங்கும் என எதிர்பார்க்கப்படுகிறது. 

• விவேக்பாரதி

கூகுள் மோட்ஸ் பற்றிய செய்தி

டிஎண்டியின் புதிய மாற்றம் பற்றிய செய்தி

யூட்யூப் சேவையைப் பணம் செலுத்திப் பார்க்கும் முதன்மைப் பயனர்கள் தங்கள் நண்பர்களுக்கும் விளம்பரம் இல்லா காணொளிகளைப் பகிர முடியும்.

இணையத்தில் இருப்பதெல்லாமே விலையில்லாப் பொருள் என்பதே பெரும்பாலானவர்களின் எண்ணம். இணையச் சேவைகளுக்குப் பணம் செலுத்துவதென்றாலே ஒவ்வாமை உண்டு. சமூகவலைத்தளங்கள் தங்கள் தளங்கள் இயங்குவதே பயனர்களால்தான் என்பதால் அவர்கள் நேரத்தையே தங்கள் வருமானத்துக்குப் பயன்படுத்துகின்றன. தங்கள் சேவையைப் பெறத் தாங்கள் காண்பிக்கும் விளம்பரங்களைப் பொறுமையாகப் பார்க்கவேண்டும் என்கின்றன.

கூகுள் நிறுவனத்தின் யூட்யூப் சேவையும் இதற்கு விதிவிலக்கல்ல. எனினும் சில பயனர்கள் பணம் செலுத்தினால் விளம்பரம் இன்றிக் காணொளிகளைக் காண இயலும் எனில் அதை வரவேற்கிறார்கள். யூட்யூப், பணம் செலுத்திப் பயன்படுத்தும் முதன்மைக் கணக்குகளை அதனடிப்படையிலேயே அறிமுகப்படுத்தியது. சிலரோ, அதெல்லாம் பரவாயில்லை, நான் விளம்பரம் பார்த்துக்கொள்கிறேன், எக்காரணம் கொண்டும் பணம் கேட்காதே என்ற நிலைப்பாட்டில் இருப்பவர்கள்.

அநேகமாக அப்படிப்பட்ட பயனர்கள் எண்ணிக்கையே அதிகம். விளம்பரத்தைத் தடுக்கச் சில கணினி நிரல்களையும் இவர்கள் பயன்படுத்துகிறார்கள். இவற்றை யூட்யூப் கண்காணிக்கிறது. விளம்பரத் தடுப்பான் பயன்படுதுவதை அறிந்தால் யூட்யூப் தானே காணொளியை கடைசி நொடிக்கு எடுத்துச் சென்று முடித்துவைக்கிறது என்றும் சொல்கிறார்கள். விளம்பரத் தடுப்பானை எப்படித் தடுக்கிறோம் என்பது பற்றியெல்லாம் கூகுள் விவரமாகப் பேசுவதில்லை. எனினும் விளம்பரத் தடுப்பான்களைப் பயன்படுத்துவது யூட்யூப் சேவையைப் பயன்படுத்தும் கொள்கைகளுக்கு எதிரானது எனத் தெரிவித்துள்ளது.

பணம் செலுத்திப் பார்க்க விரும்பாதவர்களைக் கவரும் வழியாகத்தான் கூகுள் ஒரு புதிய திட்டத்தை அறிமுகப்படுத்தியுள்ளது. கட்டணம் செலுத்தும் பயனர்கள், ஏதேனும் காணொளியை விளம்பரமின்றிப் பார்க்க, தன் நண்பருக்குப் பகிர நினைத்தால் அப்படிச் செய்ய வாய்ப்பு கொடுக்கிறது கூகுள். ஒன்றல்ல, பத்து காணொளிகளை இப்படிப் பகிரலாம்.

காணொளிக்குக் கீழே பகிரவும் என்பதை அழுத்தினால் அதற்கான வாய்ப்பினைக் காண்பிக்கும். ஒருவேளை ஏற்கெனவே பணம் செலுத்திப் பயன்படுத்தும் நண்பருக்கு இப்படி விளம்பரமில்லாக் காணொளியைத் தவறுதலாக அனுப்பினால் பரவாயில்லை. கூகுள் அதைக் கணக்கில் எடுக்காது. ஒவ்வொரு மாதமும் இதுபோலப் பத்து காணொளிகளைப் பகிரலாம். தற்போதைக்கு ஐக்கிய ராஜ்ஜியம், கனடா, துருக்கி, மெக்ஸிகோ உள்ளிட்ட சில நாடுகளில் மட்டுமே இது நடைமுறைக்கு வந்துள்ளது.

விளம்பரம் இன்றி பார்க்கும் அனுபத்தை விரும்பும் பயனர், பணம் செலுத்தி யூட்யூப் சேவையைப் பெற ஆர்வம் காட்டலாம். தற்போது கட்டணம் செலுத்தி முதன்மைக் கணக்கு வைத்திருக்கும் சிலரிடம் பேசினோம். கொடுக்கும் பணத்தின் மதிப்புக்கு ஏற்ற சேவை கிடைப்பதாகவே சொல்கிறார்கள். விளம்பரத் தொல்லை இல்லையென்பது மட்டுமின்றி திறன்கருவியின் திரை பூட்டியிருந்தாலும் காணொளி தொடரும். தரவிறக்கம் செய்து பின்னர் பார்க்கும் வசதியும் உள்ளது. யூட்யூப் இசையும் இலவசம்.

தொடர்புடைய இணையத்தளங்கள்

ஆண்டிராய்டுபோலிஸ் தளத்தின் செய்தி

விளம்பரத்தடுப்பான் பற்றிய செய்தி

வாகனங்களில் பயன்படுத்தப்படும் ஆண்டிராய்டு ஆட்டோமோட்டிவ் (Android Automotive) இயங்குதளத்துடன் ஒருங்கிணைந்து செயல்படக்கூடிய ஒரு டாஷ்கேம் செயலியை உருவாக்கியுள்ளது, கூகுள் நிறுவனம்.

அண்மையில் பெங்களூருவில் எடுக்கப்பட்டதாக காணொளி ஒன்று இணையத்தில் சுற்றிவந்தது. வாகனத்தின் முன்னே ஒருவர் வந்து விழுகிறார். அவரை மோதாமல் வண்டி நிற்கிறது. விழுந்தவரை நோக்கி வாகனம் ஓட்டுபவர் “வண்டியில் டாஷ்கேம் இருக்கிறது” என்று சொல்லும் ஒலி கேட்கிறது. விழுந்தவர் எழுந்து ஓரமாக நிற்க வண்டி சாலையில் பயணத்தைத் தொடர்கிறது. வேண்டுமென்றே மோதி அடிபட்டதாகச் சொல்லிப் பணம் பறிக்க நினைத்த நபர், அது சாத்தியம் இல்லை என்பதை உணர்ந்து ஒதுங்கி நின்றதும் தன்னை ஏமாற்ற முயன்றவரைத் தன் தொழில்நுட்ப வசதியால் சமாளித்து சண்டைபோடாமல் வாகனஓட்டி இயல்பாக இந்நிகழ்வைக் கடந்ததையும் வேடிக்கையாகப் பலர் பகிர்ந்திருந்தனர்.

இம்மாதிரி மோசடிகளுக்கு மட்டுமின்றி காப்பீட்டு மோசடிகளைத் தவிர்க்கவும் வாகன முகப்பில் பொருத்தப்படும் காணொளிக்கருவிகள் உதவுகின்றன. விபத்து நேரும்போது சரியான இழப்பீடு வாங்க சான்றாகவும் இக்காணொளிகள் பயன்படுகின்றன. ஓட்டுநர் நடத்தையைக் கண்காணிக்கவும் சில நிறுவனங்கள் பயன்படுத்துகின்றன. பயணத்தின் போது இப்படிக் காணொளியைப் பதிவு செய்வது பாதுகாப்புச் சிக்கல்களுக்கும் தீர்வாக உள்ளது.

இவை வாகனத்தின் கண்களாகவும் செயல்படுகின்றன என்றால் மிகை இல்லை. 1980களில் ரஷ்யாவில் முதல்முறையாக இவை பாதுகாப்பு கருவியாக பயன்படுத்தப்பட்டன. பின்னர், சீனாவில் இவை  பரவலாக பயணிகள் பாதுகாப்புக்காகப் பயன்பட்டன. இப்போது, உலகளவில் பாதுகாப்பு சிந்தனையுடன் வாகனங்களை வடிவமைக்கும் அனைத்து நிறுவனங்களும் வாகனத்தின் முகப்பில் காணொளிப்பதிவுக் கருவியை வைப்பதை முக்கியமான, தேவையான வசதியாகக் கருதுகின்றன.

ஆண்டிராய்டு ஆட்டோமோட்டிவ் என்பது, ஆண்ட்ராய்டு ஆட்டோ போல திறன்பேசியில் இருந்து காட்சியைக் காட்டும் முறையல்ல. இது, வாகனங்களின் உள்ளேயே இணைக்கப்பட்டு நேரடியாக இயங்கும் முழுமையான ஆண்டிராய்டு இயங்குதளமாகும். குரல் கட்டுப்பாடுகள், மூன்றாம் தரப்பு செயலிகள், ஓடிஏ(OTA) அப்டேட்கள் போன்றவை இதன் முக்கியமான அம்சங்களாகும். இதன் மூலம் விளையாடவும் முடியும் என்கிற செய்தியே முன்னரே செல்லினம் தளத்தில் வெளியிட்டிருந்தோம். இந்த இயங்குதளத்தின் மற்றொரு சிறப்பாக டாஷ்கேம் செயலியும் இருக்கிறது.

வாகனத்தின் முகப்பில் பொருத்தப்படும் காணொளிப்பதிவுக் கருவிகளில், கம்பி இல்லா தரவு பரிமாற்றம், இரவு நேர பதிவு திறன், வேகக் கணிப்பு மற்றும் இடம் குறித்த தகவல் சேமிப்பு போன்ற பல அம்சங்கள் உள்ளன. நவீன வாகனங்களில், பல்வேறு மின்னணு கருவிகள் மற்றும் பல காணொளிக்கருவிகள் உள்ளன. இவை, வாகனத்தின் பின்புறத்தில் உள்ள நபர்கள் அல்லது பொருள்களை கண்டறிவதற்கும், மோதல்களைத் தவிர்ப்பதற்கும் பயன்படுகின்றன.

எனினும், சில வாகனங்களில் மட்டுமே சுற்றியுள்ள சூழலைப் பதிவு செய்யும் வசதி உள்ளது. பெரும்பாலான வாகனங்களில் (ஆண்டிராய்டு ஆட்டோமோட்டிவ் இயங்கும் கார்களும் கூட) வாகனத்தின் முகப்பில் காணொளிப்பதிவு செய்யும் கருவியை தனியாக வாங்கிப்பொருத்த வேண்டியுள்ளது. இந்த நிலையை மாற்றுவதற்காகவே  கூகுள், வாகனங்களில் எளிதாக இணைக்கக்கூடிய திறந்த மூல  டாஷ்கேம் செயலியை உருவாக்கியுள்ளது.

வாகன உற்பத்தியாளர்கள், தங்களுக்கேற்றவாறு இதை மாற்றி வடிவமைத்து, ஆண்டிராய்டு ஆட்டோமோட்டிவ் இயங்கும் வாகனங்களில் எளிதாக ஒருங்கிணைக்க முடியும். இதன் மூலம், பாதுகாப்பு மட்டுமல்ல, தொழில்நுட்ப ரீதியாகவும் வாகனங்கள் மேலும் சிறப்படைய வாய்ப்பு உள்ளது.

தொழில்நுட்பமும் பாதுகாப்பும் இணைந்து பணயம் செய்யும் இந்த நவீன உலகில், கூகுள் டாஷ்கேம் செயலி ஒரு பயனுள்ள முன்மாதிரியாகத் திகழும். எதிர்காலத்தில் இது பல வாகனங்களில் இயல்பான அம்சமாக மாறும் என்றும் நம்பலாம்.

• நவீனா

கூகுள் நிறுவனம் தனது அதிநவீன செயற்கை நுண்ணறிவு மாதிரி ஜெமினி 2.5 புரோ-வை அனைத்து பயனர்களுக்கும் இலவசமாக வழங்குவதாக அறிவித்துள்ளது. இதற்கு முன்பு, மாதந்தோறும் கட்டணம் செலுத்தும் ஜெமினியின் மேம்பட்ட உறுப்பினர்கள் மட்டுமே இதைப் பயன்படுத்த முடிந்தது.

கூகுள் நிறுவனத்தின்  டீப்மைன்ட் அணியைச் சேர்ந்தவர்கள் உருவாக்கிய ஜெமினி 2.5 புரோ, இதுவரை கூகுள் வெளியிட்டுள்ள நுண்ணறிவு மாதிரிகளில் அதிகத் திறன் வாய்ந்ததாகவும் முன்பிருந்த நுண்ணறிவு மாதிரிகளைவிட மேம்பட்ட செயல்திறனை கொண்டுள்ளதாகவும்  கருதப்படுகிறது. அது மட்டுமன்றி இதன் மின்சார நுகர்வும் குறைவு.

ஜெமினி செயற்கை நுண்ணறிவு ஒரு முழுமையான பல்துறை (Multimodel) தொழில்நுட்பம் ஆகும். இது ஒரே நேரத்தில் உரை, படம், ஒளிவழி, ஒலிவழி, மற்றும் கணினி மொழிகளை புரிந்துகொள்ளும் திறன் பெற்றுள்ளது. ஜிபிடி-4 போலவே, இதுவும் படங்களை புரிந்துகொள்ளும் திறன் கொண்டது. ஆனால் ஜெமினி 2.5 ப்ரோ, தனித்தனியாக துணை மாதிரிகளை பயன்படுத்தாமல், இயல்பாகவே எல்லா தரவுகளையும் ஒரே வடிவமைப்பில் கையாளும் திறனைக் கொண்டுள்ளது.

பல்துறை செயற்கை நுண்ணறிவு தொழில்நுட்பம் மனித உணர்வுகள், புரிதல் மற்றும் உளவியல் செயல்பாடுகளை மேம்படுத்த உதவுகிறது. இந்த புதிய நுண்ணறிவு மூலம், மனிதக் கண்காணிப்பு இல்லாமல் பிழை திருத்தம், அனைத்து ஊடகத் தரவுகளையும் ஒரே இடத்தில் செயலாக்கம், மேம்பட்ட செயற்கை நுண்ணறிவு பயன்பாடுகள் போன்ற செயல்பாடுகளை சிறப்பாக மேற்கொள்ள முடியும்.

ஜெமினி 2.5 மாதிரிகள் மனிதனைப்போல் சிந்திப்பதற்காக உருவாக்கப்பட்ட மாதிரிகள். இவை பதிலளிக்கும் முன் தங்களின் எண்ணங்களை ஆராயும் திறனைக் கொண்டவை, இதனால் மேம்பட்ட செயல்திறனையும் உயர்ந்த துல்லியத்தையும் பெற முடிகிறது. இத்துறையில் ஆராயும் திறன் என்பது வெறும் வகைப்படுத்தலும் கணிப்பும் மட்டுமல்ல. அது தகவலை பகுப்பாய்வு செய்வது, தர்க்கரீதியில் முடிவுகளை எடுப்பது, சூழ்நிலை மற்றும் நுணுக்கங்களை உணர்வது, மற்றும் அறிந்த முடிவுகளை எடுப்பது போன்ற திறன்களை குறிக்கிறது.

நீண்ட காலமாக, வலுவூட்டப்பட்ட கற்றல் (reinforcement learning) மற்றும் சங்கிலி எண்ணத் தூண்டல் கட்டளை (chain-of-thought prompting)  போன்ற நுட்பங்களைப் பயன்படுத்தி, மேலும் புத்திசாலியாகவும், ஆராயும் திறனுடன் கூடியதாகவும் உருவாக்க முயற்சிகள் மேற்கொள்ளப்பட்டு வந்தன. இதன் தொடர்ச்சியாக, கூகுளின் முதல் சிந்திக்கும் மாதிரியான ஜெமினி 2.0 மின்னல் சிந்தனை( Flash Thinking) அண்மையில் அறிமுகப்படுத்தப்பட்டது. இப்போது, ஜெமினி 2.5 மூலம், மேலும் மேம்பட்ட அடிப்படை மாதிரியை  மேம்பட்ட பயிற்சி நுட்பங்களுடன் இணைத்து, புதிய செயல்திறன் நிலையை அடைந்துள்ளது. இதன்மூலம் அவை மேலும் சிக்கலான பிரச்சனைகளை கையாள முடியும். தற்போது சோதனைக்கட்டத்தில் உள்ள ஜெமினி 2.5 ப்ரோ, இணைய உலாவி விரிவாக்கங்கள், கோப்பு பதிவேற்றம் போன்ற அம்சங்களை ஆதரிக்கிறது. விரைவில் இது ஆண்ட்ராய்டு மற்றும் ஆப்பிள் இயக்குதளங்களுக்கான பயன்பாடுகளுக்கு கிடைக்கும்.

தமிழ், ஜப்பானிய மொழி, அரபு மொழி போன்ற சிக்கலான நூற்றுக்கும் மேற்பட்ட மொழிகளை கூகுள் ஜெமினி ஆதரிக்கிறது. இதன் மூலம்,  மொழிபெயர்ப்பு மற்றும் தகவல் சுருக்கம் போன்ற பணிகளை எளிதாக மேற்கொள்ளலாம். மேலும், சிக்கலான கணிதக் கணக்குகளை தீர்க்கவும்  தர்க்கத் தொடர்புடைய புதிர்களை பகுப்பாய்வு செய்யவும் ஜெமினி செயற்கை நுண்ணறிவு தொழில்நுட்பதைப்பயன்படுத்தலாம்.

கூகுளின் செயற்கை நுண்ணறிவு முன்னேற்றத்தில் மிகப்பெரிய அடையாளமாக பார்க்கப்படும் ஜெமினி 2.5 புரோ (பரிசோதனை கட்டம்), செயற்கை நுண்ணறிவு செயல்திறனை ஒப்பிடும் அடிப்படையான தரவரிசையில் (LMArena) முதலிடம் பிடித்தது ஆச்சரியம் ஒன்றும் இல்லை. இந்த இலவச வெளியீட்டு செயற்கை நுண்ணறிவை அனைவருக்கும் கொண்டு சேர்க்க வேண்டும் என்பதே கூகுளின் முதன்மையான நோக்கமாக உள்ளது.  

• நவீனா

ஜிமெயிலில் மின்னஞ்சல் எழுத உதவும் ஹெல்ப் மி ரைட் (Help Me Write) வசதியை மேலும் பல மொழிகளில் வழங்க கூகுள் திட்டமிட்டுள்ளது. இவ்வசதி தமிழுக்கும் நீட்டிக்கப்படும் என எதிர்பார்க்கப்படுகிறது. 

உலகின் அதிகமான பயனர்களைக் கொண்டு மின்னஞ்சல் உலகின் அரசனாக விளங்குகிறது ஜிமெயில். கூகுள் நிறுவனம் தன் பயனர்களுக்கு மின்னஞ்சல் அனுப்புவதை எளிமையாக்கப் பல்வேறு வசதிகளை வழங்கி வருகிறது. மின்னஞ்சல்களுக்கு தானியங்கியாக மறுமொழிகள் அனுப்பும் வசதி, எழுதும்போது வாக்கியத்தை நிறைவு செய்யப் பரிந்துரைகள் வழங்கும் வசதி என்பது உள்ளிட்ட பல வசதிகளை நாம் பயன்படுத்தி வருகிறோம். உலகளாவிய பயனர்களுக்கு இவ்வசதிகளின் மூலம் பல நன்மைகளை வழங்கி, தன் பரப்பை விரிவாக்கி வரும் கூகுள், செயற்கை நுண்ணறிவைப் பயன்படுத்தி ஒரு மின்னஞ்சலை முழுவதுமாக எழுதும் ஹெல்ப் மீ ரைட் வசதியை அறிமுகப்படுத்தியுள்ளது. 

ஆரம்பகட்ட சோதனை முயற்சியாக சில பயனர்களுக்கு மட்டும் இவ்வசதி வழங்கப்பட்டுள்ளதாகவும், விரைவில் அதிகாரப்பூர்வமாக அனைவருக்கும் கிடைக்கும் வகை செய்யப்படும் என்றும் தெரிவித்திருக்கிறது கூகுள்.  

நமது ஜிமெயிலில், வழக்கமாக மின்னஞ்சல் எழுதும் இடத்தில் சென்று, சுட்டியர வலதுபுறம் தட்டி ஹெல்ப் மீ ரைட் வசதியை இயக்கலாம். சிலருக்கு மின்னஞ்சல் எழுதும் பெட்டியின் கீழ்ப் பகுதியிலேயே கூட்டல் குறியுடன் பேனா அமைப்பு ஒன்று கொடுக்கப்பட்டிருக்கும். அதைச் சொடுக்கியும் இயக்கலாம். பின்னர் அதில் வரும் பெட்டியில், நாம் எழுத விரும்பும் பொருளின் சாரத்தை ஒரு வரியிலேயோ, சில சொற்களிலேயோ உள்ளிட வேண்டும். கொடுத்த சில நொடிகளில் மின்னல் வேகத்தில் நமக்கான மின்னஞ்சல் தயார். 

ஒருவேளை அதில் மாற்றங்கள் செய்ய விரும்பினால், கீழே காட்டப்படும் ரிவைஸ் (revise) என்பதை அழுத்தி, வேறு வடிவத்திலான இன்னொரு மின்னஞ்சலைப் பெற்றுக் கொள்ளலாம். அலுவல் மொழியில் எழுதுவது, அன்பருக்குக் கடிதம் எழுதுவது என்று இதில் பல தேர்வுகள் கொடுக்கப்படுகின்றன. அதில் நமக்கு விருப்பமானதைச் சொடுக்கி, அந்தத்  தன்மையில் நமக்கான மின்னஞ்சலைப் பெறலாம். புதிய மின்னஞ்சல் மட்டுமின்றி, ஏற்கனவே வந்த மின்னஞ்சல்களுக்கு விரைவில் மறுமொழி எழுதவும் இவ்வசதி பயன்படுகிறது. 

கடந்த மாதம் வரை ஆங்கிலம், ஸ்பானிஷ், போர்த்துகீஸ் ஆகிய மொழிகளில் மட்டும் இவ்வசதி இருந்தது. இதைத்தான் இத்தாலியன், பிரெஞ்சு மற்றும் ஜெர்மன் மொழிகளுக்கும் நீட்டிப்பதாக மார்ச் 24-ம் தேதி கூகுள் நிறுவனம் அறிவித்திருக்கிறது.  

இந்த அறிவிப்பு, பல மொழிகளைப் பேசும் கூகுள் பணிதள (workspace)  பயனர்களுக்கு மிகப்பெரிய உதவியாக அமையும். மேலும், தொழில்நுட்ப வளர்ச்சியின் அடிப்படையில் இந்த வசதி எதிர்காலத்தில் மேலும் பல மொழிகளை ஆதரிக்கும் வகையில் விரிவடையும் என எதிர்பார்க்கப்படுகிறது. ஹெல்ப் மீ ரைட் போலவே செயற்கை நுண்ணறிவு மூலம் மின்னஞ்சல் எழுதும் வசதிகள் பல இருக்கும் நிலையில், கூகுளின் அதிகாரப்பூர்வ அமைப்பு பல மொழிகளுக்கும் விரிவாக்கம் அடைவது இணைய உலகில் மிகுந்த நம்பிக்கையை உண்டாகியிருக்கிறது.

• விவேக்பாரதி

மெட்டா நிறுவனம் யுனெஸ்கோ அமைப்போடு இணைந்து செயற்கை நுண்ணறிவில் அதிகம் பயன்படுத்தப்படாத மொழிகளை மேம்படுத்தும் திட்டம் ஒன்றைச் செயல்படுத்த உள்ளதாக அறிவித்துள்ளது.

கூகுள் மொழிபெயர்ப்பானில் நமக்குத் தேவையான ஒன்றை மொழிபெயர்த்துப் புரிந்துகொள்வதற்குள் போதும் போதும் என்று ஆகிவிடும். இந்த இயந்திர மொழியை நமக்கேற்ற நடையில் கொண்டுவர நிறுவனங்கள் முயற்சி எடுத்து வருகின்றன. தற்போது உள்ள ஜெமினி, கிளாட், சாட்ஜிபிடி, டீப்சீக் போன்ற மொழிமாதிரிகளின் மொழிபெயர்ப்புச் சேவை, முந்தைய மொழிபெயர்ப்புத் தரத்தைவிடப் பல மடங்கு மேம்பட்டதாக உள்ளது. மெட்டாவின் அடிப்படை செயற்கை நுண்ணறிவு ஆராய்ச்சி (FAIR) குழுவானது இயந்திர மொழிபெயர்ப்பை மெருகூட்ட பல்வேறு முன்னெடுப்புகளை மேற்கொண்டு வருகிறது. இது மனிதப் பகுத்தறிவு சிந்தனையைப் பயன்படுத்தி, மொழிபெயர்ப்பு செய்வதை நோக்கமாகக் கொண்டுள்ளது.

2022 ஆம் ஆண்டில், மெட்டா அறிமுகப்படுத்திய NLLB திட்டம், பல மொழிகளுக்கான உணர்வுப்பூர்வமான இயந்திர மொழிபெயர்ப்பு மாதிரியாக இருந்தது. இது மொழிபெயர்ப்பிற்கான எதிர்கால ஆராய்ச்சி மற்றும் மேம்பாட்டிற்கான அடித்தளத்தை உருவாக்கியது.

இந்த ஆராய்ச்சியை ஐநா அமைப்பின் யுனெஸ்கோ மற்றும் ஹக்கிங் ஃபேஸ் ஆகியவற்றோடு இணைந்து செய்ய உள்ளதாக அறிவித்திருந்தது மெட்டா. இப்போது பல்வேறு பேச்சுவழக்குகளைச் செயற்கை நுண்ணறிவில் இணைத்து அதனை மேம்படுத்த உள்ளதாக அறிவித்துள்ளது. அதற்காக பணியாற்ற மொழி தொழில்நுட்ப கூட்டாளர் திட்டம் என்பதையும் தொடங்கியுள்ளது.

இது அதிகளவில் பயன்படுத்தப்படாத, மின்னணு வடிவம் பெறாத மொழிகளை மேம்படுத்துவதை நோக்கமாகக் கொண்டுள்ளது. மெட்டாவோடு இணைந்து பணியாற்ற விரும்பும் அமைப்புகளுக்கும், மொழிபெயர்ப்பாளர்களுக்கும் அழைப்புவிடுக்கப்பட்டுள்ளது. பத்துமணி நேரத்திற்கும் அதிகமான குரல் பதிவுகள் வைத்திருருந்தால் நீங்களும் இதில் பங்கேற்கலாம். அதோடு எண்ணற்ற எழுத்துப் பிரதிகளையும் எதிர்பார்க்கிறது மெட்டா.

இதில் இணைபவர்கள் கூகுளோடு இணைந்து பணியாற்ற முடியும். அதோடு மெட்டாவின் ஆராய்ச்சிக் குழுவால் நடத்தப்படும் தொழில்நுட்பப் பட்டறைகளுக்கான அனுமதியும் கிடைக்கும். அங்கு மொழித் தொழில்நுட்பங்களை உருவாக்கத் தேவையான பயிற்சிகளும் வழங்கப்படும். இதற்கான விண்ணப்பப் படிவமும் வழங்கப்பட்டுள்ளது.

இதோடு செயற்கை நுண்ணறிவுகளின் மொழிபெயர்ப்புத் தரத்தை அளவிடும் பெஞ்ச்மார்க் என்ற திட்டமும் அறிமுகப்படுத்தப்பட்டுள்ளது. இது மொழியியல் வல்லுநர்களால் கவனமாக வடிவமைக்கப்பட்ட அமைப்பைக் கொண்டுள்ளது. பெஞ்ச்மார்க்கைப் பற்றிய மேலதிகத் தகவல்களை ஹக்கிங் ஃபேஸ் தளத்தில் படித்துத் தெரிந்துகொள்ளுங்கள்.

• மு. இசக்கிமுத்து

கூகுள் நிறுவனத்தின் சந்தை ஆதிக்கத்தைக் கட்டுப்படுத்தும் வகையில் அமெரிக்க நீதித்துறை அமைச்சகம், அதன் குரோம் உலவியை விற்பனை செய்ய உத்தரவிட வேண்டும் என்று நீதிமன்றத்தில் கோரிக்கை விடுத்துள்ளது. இணையதள விளம்பர சேவைகளில் ஏகபோக உரிமையை கூகுள் மீறுவதைக் கட்டுப்படுத்தும் நோக்கில் இந்நடவடிக்கை முன்மொழியப்பட்டுள்ளதாகத் தெரிகிறது. 

கூகுள் ஏகபோக உரிமையாளரா?

அமெரிக்க நீதித்துறை அமைச்சகம் கடந்த 2023-ம் ஆண்டு, அமெரிக்காவின் ஏகபோக உரிமைச் சட்டங்களை மீறுவதாக கூகுள் நிறுவனத்தின் மீது வழக்கு தொடர்ந்தது. அதில் ஆப்பிள், ஆண்டிராய்டு கருவிகளின் இயல்புநிலை தேடுபொறியாக, கூகுள் குரோம் உலவியை நிறுவ, அந்நிறுவனம் பல பில்லியன் டாலர்கள் கொடுத்து, ஒப்பந்தங்கள் போட்டதாகக் குறிப்பிடப்பட்டது. மேலும் கடந்த 10 ஆண்டுகளாக இந்த விதிமீறலை மறைக்க பல்வேறு நடவடிக்கைகளை கூகுள் மேற்கொண்டதாகவும் குற்றஞ்சாட்டப்பட்டது. இதை விசாரித்த நீதிபதி அமித் மேத்தா, 2024-ம் ஆண்டு வழங்கிய தீர்ப்பில், கூகுள் போட்டியாளர்களின் சந்தை அணுகுமுறையைத் தடுப்பதாகவும், பயனர்களின் விருப்பங்களைக் கட்டுப்படுத்துவதாகவும் உறுதிப்படுத்தி, கூகுளை ஓர் ஏகபோக உரிமையாளர் (Monopolist) என அறிவித்தார். வர்த்தகத்தில் ஏகபோக உரிமை நிலையைப் பெறுவது சட்டவிரோதமல்ல என்றாலும், அதைப் பயன்படுத்தி சந்தைப் போட்டியைக் கட்டுப்படுத்த முயல்வது சட்டவிரோதமானது என்றும் குறிப்பிட்டார். 

கூகுள் கருவிகளின் விற்பனை 

இந்த வழக்கில் அண்மையில் அமெரிக்க நீதித்துறை அமைச்சகம் மேலும் ஒரு கோரிக்கையைத் விடுத்துள்ளது. அதில், கூகுள் தனது குரோம் உலவியை விற்பனை செய்ய நீதிமன்றம் உத்தரவிட வேண்டும் என்றும், ஆப்பிள், மொசில்லா போன்ற நிறுவனங்களுடன் கூகுள் கொண்டுள்ள இயல்புநிலைத் தேடுபொறிக்கான ஒப்பந்தங்களை ரத்து செய்ய உத்தரவிட வேண்டும் என்று கோரிக்கை விடுக்கப்பட்டது. கூகுளின் இந்தச் செயல் போட்டியாளர்களை விலக்கிச், சந்தை ஆதிக்கத்தை நிலை நிறுத்துவதாக உள்ளதாகவும் தெரிவிக்கப்பட்டது. ஏற்கனவே கூகுளின் ஏகபோக உரிமைத்துவத்தை நீக்கும் வகையில், கூகுள் பிளே, கூகுள் குரோம் உள்ளிட்ட கருவிகளை விற்பனை செய்யலாம் என்று நீதிபதி அம்த் மேத்தா குறிப்பிட்டிருந்தார். இந்நிலையில் அதை வலியுறுத்தி கோரிக்கைகள் வைக்கப்பட்டுள்ளன. இதுகுறித்த விசாரணை வரும் ஏப்ரல் மாதம் நடைபெறும் என்று கூறப்படுகிறது.

குரோம் விற்பனையின் தாக்கம்

கூகுள் குரோம் உலவி விற்பனை செய்யப்பட்டுவிட்டால், அந்நிறுவனத்தின் வருமானம் பெருமளவில் பாதிப்புக்கு உள்ளாகும் என்று கணிக்கப்பட்டுள்ளது. குறிப்பாக ஆப்பிளுடன் கூகுள் 20 பில்லியன் அமெரிக்க டாலர் மதிப்பீட்டில் கொண்டுள்ள ஒப்பந்தம் நிறுத்தப்படும் என்று கூறப்படுகிறது. மேலும், உலக அளவில் 3.69 பில்லியன் மக்களின் அன்றாடப் பயன்பாட்டில் உள்ள கூகுள் குரோம் உலவி மற்றும் அதன் பயன்களில் பாதிப்பு ஏற்படும் வாய்ப்பும் உள்ளதாகக் கூறப்படுகிறது.  ஏகபோக உரிமை நிலையைத் தவறாகப் பயன்படுத்தி, சந்தையில் போட்டியைத் தவிர்ப்பதுடன் பயனர்களின் விருப்பங்களையும் கூகுள் கட்டுப்படுத்துவதற்கு இப்புதிய நடவடிக்கை கடிவாளமிடுவதுடன், தொழில்நுட்ப சந்தையின் முக்கியமான மாற்றத்திற்கு வழிவகுக்கும் என்றும் பார்க்கப்படுகிறது.

கூகுளின் பதில் 

இந்நிலையில் கூகுள் நிறுவனம், நீதித்துறை அமைச்சகத்தால் தீவிரமான குற்றச்சாட்டுகள் முன்வைக்கப்படுவதாகவும், கூகுளின் வரையறுக்கப்பட்ட அங்கீகாரத்திற்குள் அதீத தலையீடு நிகழ்வதாகவும் விமர்சித்துள்ளது. இந்த வழக்கின் தீர்ப்பைப் பொறுத்து, மேல்முறையீட்டுக்கும் தயார் நிலையில் உள்ளதாக கூகுள் கூறியுள்ளது. இந்த வழக்கு, இணையளத்தில் ஏகபோக உரிமைகள் மற்றும் அதற்காக நிலவும் போட்டிகள் குறித்த முக்கியமான விவாதங்களைக் கிளப்பியுள்ளது குறிப்பிடத்தக்கது. 

• விவேக்பாரதி

திரையில் காணும் எதையும் வட்டமிட்டு, அதைப் பற்றித் தேடும், கூகுள் சர்க்கிள் டு சர்ச் என்கிற சுழித்துத் தேடும் வசதி கூகுள் லென்ஸ் செயலியுடன் போட்டியிடுகிறது.

வலையுலாவிக்குச் சென்று கூகுள் தேடுபொறியைக் கொண்டு தேடித் தெரிந்துகொண்ட பழக்கமெல்லாம் மெல்ல மெல்லக் காணாமல் போகிறது. பெரும்பாலானோர் அரட்டைச் செயலிகள் மூலமே தேடித் தெளிய ஆவல் காட்டுகின்றனர். நம்முடைய திறன்கருவித் திரையில் நாம் பார்க்கும் விஷயத்தைப் பற்றி மேலும் அறிந்துகொள்ள கூகுள் உதவியை நாடுவதென்றாலும் கூகுள் லென்ஸ் இருக்கிறது. கிட்டத்தட்ட அதைப் போன்றே செயல்படும் சர்க்கிள் டு சர்ச் எனப்படும் சுழித்துத் தேடும் வசதி கடந்த ஆண்டு அறிமுகமானது.

ஆரம்பத்தில் எதற்கு ஒன்று போலவே மற்றொன்று எனப் பயனர்கள் கேட்டனர். தற்போது சில பயனர்கள் இதில் உள்ள வசதிகள் கூகுள் லென்ஸ் செயலியைவிடச் சிறப்பாக இருப்பதாகத் தெரிவிக்கின்றனர். கூகுள் லென்ஸ் செயலி, திரையில் காணும் எதைப் பற்றியும் கூடுதல் தகவல்கள் தரும். படத்தில் எழுத்துகள் இருந்தால் வெட்டி எடுத்து ஒட்டிக் கொள்ளும் வகையில் மாற்றித் தரும். எழுத்தையே தேடுபொருளாகவும் மாற்றித் தேடலாம். படத்தைப் படமாகவே தேடவும் முடியும். சாலை ஓரத்தில் இருக்கும் பூ ஒன்றைப் படமெடுத்து என்ன பெயர் என்று அறியலாம். அறிவிப்புப் பலகையில் புரியாத மொழியில் இருந்தால் அதைப் படமெடுத்து நமக்குத் தெரியும் மொழியில் மாற்றிப் படிக்கலாம்.

இத்தனை வசதிகள் இருந்தும் ஒரு சிறிய குறை இருக்கிறது. இன்ஸ்டா, பேஸ்புக் போன்ற மற்ற செயலிகளில் எதையாவது பார்த்து அதைப் பற்றித் தேட விரும்பினால் அந்தத் திரையைப் படமெடுத்துக்கொண்டு போய் கூகுள் லென்ஸ் செயலியிடம் தரவேண்டும். கூகுள் பிக்சல் பயன்படுத்துபவர் எனில் கீழிருந்து மேல்நோக்கித் தேய்த்தாலே லென்ஸ் செயலி வரும். ஆனால் மற்ற ஆண்டிராய்டு திறன்பேசிகளில் அந்த வசதி கிடையாது.

இதில்தான் சுழித்துத் தேடும் வசதி லென்ஸ் செயலியை முந்திவிடுகிறது. இதில் படமெடுத்துக் கொண்டுபோய் கொடுக்கவேண்டிய அவசியம் இல்லை. எந்தச் செயலியில் என்ன செய்துகொண்டிருந்தாலும் தேடி அறிந்து கொள்ள நினைக்கும் இடத்தில் வட்டமிட்டால் போதும். விரைவுத் துலங்கல் குறியீடுகளை ஊடறியவும் முடியும். மொழிபெயர்த்துப் படிக்கவும் முடியும். திரையில் தெரிவது தொலைபேசி எண்ணாக இருந்தால் அதைத் தொட்டதும் தொலைபேசி செய்யும் வாய்ப்பையும் காண்பிக்கும்.

இப்போதைக்கு எல்லா ஆண்டிராய்டு திறன்பேசிகளிலும் இது வேலை செய்யும் விதத்தில் இல்லை. சாம்சங் திறன்பேசிகளில் மட்டுமே முதலில் அறிமுகமானாலும் தற்போது ஜியோமி, நத்திங், ஒன்பிளஸ், மோட்டரோலா போன்ற பல வகைத் திறன்பேசிகளிலும் வேலை செய்கிறது. கூகுள் பிக்சலில் வேலை செய்யும் என்பதைக் குறிப்பிடவேண்டிய அவசியமில்லையல்லவா. மற்ற பல திறன்பேசிகளிலும் விரைவில் அறிமுகமாகிவிடும். உங்கள் திறன்பேசியில் ஏற்கெனவே இருந்தால், சுழித்துத் தேடும் வசதியைப் பயன்படுத்திப் பாருங்கள். வட்டமிட்டுப் பாடல்களைத் தேடும் வசதியும் இருக்கிறது.